सोमबार, १८ असोज, दाङ । थरुहट–थारुवान संघर्ष समिति दाङले राजमार्ग बन्दको कार्यक्रम फिर्ता लिएको छ । संघर्ष समितिले अब विभिन्न स्थानमा जनसभा र जनजागरणको कार्यक्रम गर्ने बताएको छ ।
साउन अन्तिम साताबाट सुरु भएको संघर्षको कार्यक्रम विगत एक साता देखि राजमार्ग बन्द गराउने तर्फ उन्मुख भएको थियो ।

संघर्ष समितिले सोमबार विज्ञप्ती जारी गर्दै अबदेखि सडक बन्न नगर्ने बताउको हो । संघर्ष समिति दाङका प्रवक्ता प्रकाशकुमार चौधरीले आन्दोलनको स्वरुप परिवर्तन भएको बताए ।
उनले बन्दका कारण सर्वसाधारणलाई असर परेकोमा माफी समेत मागेका छन् ।
उनले सरकार वार्ताकालागि सकारात्मक भएकाले आन्दोलनको स्वरुप फेरिएको बताएका छन् ।-नेपाल संदेश

सोमबार, १८ असोज, काठमाडौं । नेपालमाथि लगाएको अघोषित नाकाबन्दी हटाएको घोषणा गरेको भारतले दुई दिन नबित्दै बोली फेरेको छ ।
भारतले नेपालको संविधान संशोधन नभएसम्म नाकाबन्दी नहटाउने चेतावनी दिएको छ । भारतका लागि नेपाली राजदूत दीपकुमार उपाध्यायसँग भएको छलफलमा भारतीय विदेश मन्त्रालयले यस्तो चेतावनी दिएको हो ।

भेटवार्ताका क्रममा भारतले तेस्रो मुलुकबाट पेट्रोलियम पदार्थ ल्याउने कुराको पनि विरोध गरेको छ ।
राजदूत उपाध्यायले आइतबारमात्रै आफूहरुलाई भित्तामा पु¥याउने कोशिस भए अन्य मुलुकबाट पेट्रोलियम पदार्थ ल्याउन बाध्य हुने बताएका थिए ।
सो कुराप्रति भारतीय विदेश मन्त्रालयले आपत्ति जनाएको छ । मन्त्रालयले शीर्ष नेतृत्वको आदेश भन्दै तत्काल नाकाबन्दी नहटाउने चेतावनी दिएको हो ।
यो सँगै भारतले नेपालमाथि थप संकट खडा गर्न खोजेको प्रष्टिएको छ । भारतले आफू पनि पेट्रोलियम पदार्थ नदिने र अन्यत्रबाट ल्याउन पनि नदिने दोहोरो रणनीति लिएको देखिएको हो ।
-नेपालसंदेशबाट