७, १७ र ३५ बुँदे प्रस्ताव आफुहरुको नभएको प्रष्ट
बिहीबार, २१ असोज, काठमाडौ । संघीय समाजवादी फोरम नेपालका अध्यक्ष उपेन्द्र यादवले संयूक्त लोकतान्त्रिक मधेसी मोर्चाले ब्यवस्थापिका संसद नछाडेको बताएका छन् ।
नयाँ प्रधानमन्त्री चयनकोलागि संसद संख्याको जोड घटाउ चलिरहेको बेला रिपोर्टर्स क्लब नेपालले बिहीबार आयोजना गरेको साक्षात्कारमा उनले आफुहरुले संविधान निर्माण प्रक्रियामा असहमति प्रकट गरेर संविधानसभा मात्रै बहिस्कार गरेको स्पष्ट पारे ।

उनले आफूहरुको सहभागिता विना प्रधानमन्त्री चयन नहुने अवस्था आए पार्टी र मोर्चाबाट उपयूक्त निर्णय लिने भन्दै प्रधानमन्त्री चयन प्रक्रियामा सहभागि हुने संकेत गरे ।
उनले आगामी सरकारमा सहभागिता जनाउन सक्ने संकेत गर्दै आवश्यक सहयोगकालागि तयार रहेको बताए । अध्यक्ष यादवले सरकारले आफूहरुसँग सल्लाह नै नगरी एकतर्फी रुपमा संविधान संसोधन प्रस्ताव दर्ता गराएको विषयलाई ‘मिठो नाटक’ को संज्ञा दिदै सहमति नगरी गरेको कामले स्वामित्वमा गंभिर समस्या आएको टिप्पणी गरे ।

सीमांकनमा परिवर्तन नगरेसम्म आन्दोलन फिर्ता नहुने स्पष्ट पार्दै अध्यक्ष यादवले राज्य पुर्नसंरचना आयोगले दिएको प्रतिवेदनको आधारमा अघि बढे धेरै विषयहरु आफै हल भएर जाने दावी गरेका छन् ।
अंगिकृत नागरिकले राज्यको महत्वपूर्ण पद पाउनु पर्छ भन्ने आफूहरुको माग नभएको भन्दै अध्यक्ष यादबले केवल आफूहरुले कुनै पनि नेपाली नागरिक नागरिकताबाट बञ्चितमात्रै हुनु हुन्न भनेको प्रष्ट पारेका छन् ।
अध्यक्ष यादवले बाहिर मधेसी मोर्चाको भनि आएको ७, १८ र पछिल्लो ३५ बुँदे प्रस्ताव आफूहरुको नभएको भन्दै त्यस्ता प्रस्ताव थाहै नपाई आफूहरुको टाउकोमाथि थोपरिएको भन्दै असन्तुष्टी प्रकट गरेका छन् ।
उनले बाह्य शक्तिले आफुहरुको नाममा खेल्न खोजेको बताए । तर, त्यो शक्ति को हो भन्ने प्रष्ट पारेनन् । उनको आशय भारतले खेलेको भन्ने नै थियो ।nepalsandesh